Yè sété jouné a kréyòl é anviré gadé on vidéyo ki sé on ti mòso adan « Bad Boys II » mofrazé an kréyòl ayisyen. Adan pawti-lasa, ni on jenn gason non a-y sé Réji ka vin chèché Àn, fi a misyé Burnett pou fè-y sòti. Misyé Burnett ka mèt sa sèk asi tigason-la.

Mi vidéyo-la

An ri plen vant an-mwen ! Wadi Mawtin Lawrence toujou palé kréyol tout vi a-y. Apré an byen ri, an ay gadé ka moun ka di asi vidéyo-la. An konstaté ni plen moun ka touvé kréyòl ka rann sèn-la pi komik, pi entérésan.
Men on lidé di mwen a-y gadé kijan vèwsyon orijinal yé. Sé la an konstaté apa yenki kréyòl-la ki ka rann sèn-la komik é entérésan. Sé piplis, jan yo adapté tèks-la, pou i ka sanm nou, ki ka fè i osi déman.
Kidonk an chèché a vwè kijan fransé adapté menm sèn-la, é an pé di MoviesInCreole fò menm !

1. Lontan mwens jiré

Adan orijinal-la, i ni enpé « motherfucker » oben « fuck » sé kréyolopal pa viré mèt. Pou mwen yo té ni rézon. Fransé chwazi mofrazé yo an « putain » oben « bòwdèl » é an ka touvé sa pa ka tèlman menné on biten an plis, davwa sé komédyèn-la ja ka montré, tousèl tousèl a-yo, kijan yo ka mèt présyon asi Réji.

2. Kimoun ki Ludacris ?

Fransé pa dwèt konnèt aki misyé, davwa adan pawti a Wil Smith, yo ranplasé-y pa « Snoup Dòg ». Yo té oblijé maké ondòt tèks a rap, ki finalman pa ni ayen a vwè é mizik-la ou ka tann-la adan fim-la.
Sé ayisyen-la té pisimé chanjé tout sékans-la. Kidonk ou ka tann « Mandela » dépi koumansman a sèn-la. Kifè i ka konparé fòm a tèt a tiboug-lé épi on misil 727 avan i chanté asi ton a mòso-la.

3. Mistè Klin

La ankò, Fransé éséyé rèspèté tèks orijinal-la, men Ayisyen pran ondòt direksyon. Yo chwazi pran référans a « Mistè Klin » (Gwadloup, nou konnèt-li pou « Monsieur Propre ») pou di an kijan Misyé Bénèt paré a pliché tiboug-la si i pa menné Àn viré a dizè.

Total : Chalviraj, apa Mofrazaj

Travay-la sa ka montré-w kijan, si ou vé mèt on tèks an kréyòl ou pé pa yenki pran chak mo épi chalviré-yo. Menm ou té ké senplèman fè tèks-la paké jan nou ka palé, ka manké-w ankò. Mèt on tèks an kréyòl a pa yenki di, jan nou ka di, sé osi fè jan nou ka fè.

Apré MoviesInCreole fè travay-lasa, ou pa ka gadé on sèn épi twa Mériken, ou ni vréman lenprésyon ou ka gadé on sityasyon avè twa Ayisyen. Kidonk an santi mwen ka pran plis lapenn a Réji adan vèwsyon kréyòl-la. Anmenmdètan, an rèkonnèt on lankòlè ki ka sanm tan-nou : adan-y ni jé di mo, ni biten ègzajéré ki ka fè-w ri… lè a pa vou yo ka pran dèyè-y !

Sonjé ba MoviesInCreole on fòs. Yo ni on paj enstagram, on paj Fésbouk é o chanèl Youtub.

Si ou vé konparé sé twa vèwsyon-la voumenm a-w, mi vèwsyon orijinal-la :

Vèwsyon fransé-la :

Vèwsyon fransé